Til eru mismunandi aðferðir við að rista baunir. Í stærri verksmiðjum þar sem framleiðslan er gríðarleg og kannski ekki lagt svo mikið upp úr gæðum, er kaffi ristað í miklu magni, við mjög hátt hitastig í stuttan tíma. Þetta hefur ekki góð áhrif á baunirnar vegna þess að efnaskiptin sem eiga sér stað inni í bauninni ná ekki að þroskast almennilega. Þetta hefur gríðarleg áhrif á bragð kaffisins. En með þessari aðferð er hægt að framleiða og selja kaffið ódýrara.
Í heimi gæða kaffibauna þar sem úrvals hráefni er notað er þetta alveg bannað. Þar er notast við nokkuð sem er kallað slow roast. Þá er minna magn ristað í einu, við lægra hitastig og á lengri tíma.
Þegar kaffið er ristað hægt og rólega þá næst það besta úr bauninni vegna þess að öll efnaskiptin sem eiga sér stað t.d. umbreyting á bragð- og lyktarolíum ná að gerast á eðlilegum hraða og þá þroskast baunin til fullnustu. Einnig eru dýrari kaffibaunir yfirleitt viðkvæmari og það þarf að rista þær mjög varlega.
Það er samt aldrei notast eingöngu við hitastig til að vita hvort baunin sé tilbúin því að kaffi er mjög misjafnt og þolir misjafnar ristanir. Til dæmis þegar notað er ný uppskera af kaffi er meiri raki í baununum heldur en eldri uppskerur og þá ristast þær öðruvísi. Þótt að tæknin bruni fram og nánast ekkert virðist vera ómögulegt er ekki hægt að treysta á neitt annað en glöggt mannsaugað þegar kemur að því að ákveða hvenær kaffibaunin sé tilbúin og búin að ná fullum þroska. Brennslu meistarinn sér þegar kaffibaunin er búin að ná réttum lit og fallegri sléttri áferð.