Nú um helgina fór fram Íslandsmót kaffibarþjóna og var mótið haldið í Kringlunni að þessu sinni. Átján keppendur kepptu um titilinn besti kaffibarþjónn Íslands ásamt því að keppt var í mjólkurlistarkeppni. Á Íslandsmóti kaffibarþjóna eru framreiddir espresso, cappuccino og frjáls kaffidrykkur þar sem keppendur mega láta ímyndunaraflið ráða ferðinni og gera það yfirleitt með miklum tilþrifum.
Annað árið í röð sigraði Pálmar Þór Hlöðversson, frá Te & Kaffi, og var hann vel að sigrinum kominn. Hann mun keppa fyrir Íslands hönd á heimsmeistaramóti kaffibarþjóna sem haldið verður í Atlanta í Bandaríkjunum um miðjan apríl. Í öðru sæti varð Harpa Hrund frá Kaffitári, Ragnhildur Edda Tryggvadóttir frá Te & Kaffi í þriðja sæti, Tumi Ferrer frá Kaffitári í fjórða sæti, Katrín Alfa frá Kaffitári í fimmta sæti og Ingibjörg Ferrer frá Kaffitári í sjötta sæti. Pálmar vann einnig verðlaun fyrir besta espresso og besta cappuccino ásamt því að verða í öðru sæti í mjólkurlistakeppninni. Árangur Ragnhildar Eddu Tryggvadóttur, sem lenti í þriðja sæti, þykir líka virkilega góður og fær hún sérstakt hrós fyrir frammistöðuna.
Þetta er í fjórða skipti á síðastliðnum sex árum sem kaffibarþjónn frá Te & Kaffi sigrar á Íslandsmóti kaffibarþjóna. Það ber vott um fagmennsku, metnað og þekkingu sem ávallt er haft að leiðarljósi hjá Te & Kaffi. Jónína Tryggvadóttir, starfsmaður Te & Kaffi til margra ára og Íslandsmeistari kaffibarþjóna 2005, sá um þjálfun okkar starfsfólks og stóð sig frábærlega í því hlutverki.
Starfsfólk Te & Kaffi óskar Pálmari góðs gengis á heimsmeistaramótinu í Atlanta og þakkar öllum keppendum Te & Kaffi fyrir gott mót.
