Te og Kaffi

Te & Kaffi - Þekking og gæði í aldarfjórðung

Te & Kaffi var stofnað árið 1984 af Berglindi Guðbrandsdóttur og Sigmundi Dýrfjörð og varð fyrsta íslenska fyrirtækið til að sérhæfa sig í sölu og framleiðslu á fersku sælkerakaffi ásamt fersku tei í lausavigt. Te & Kaffi hefur alla tíð lagt sinn metnað í að flytja inn og framleiða hágæðate og kaffi. Það er helsta markmið fyrirtækisins bjóða viðskiptavinum sínum upp á framúrskarandi bolla, alltaf, allstaðar.

Kaffið spilar veigameiri þátt í starfssemi fyrirtækisins enda markaður fyrir það hér á landi mun stærri en temarkaðurinn. Með aukinni vitund almennings um hágæðakaffi hafa sóknartækifæri Te & Kaffi aukist til muna á síðustu árum. Einnig urðu ákveðin markaðsleg kaflaskil á starfssemi Te & Kaffi á 20 ára afmælisárinu, árið 2004, þegar nýtt útlit á fyrirtækinu og vöru þess var kynnt. Allar götur síðan hefur markviss hönnun verið notuð til að styrkja stöðu fyrirtækisins á markaði. Vörumerkið Te & Kaffi hefur verið mikið kynnt undanfarin fjögur ár og er í dag orðið vel þekkt.

Rekstur fyrirtækisins er mjög fjölbreyttur og unnið er að sölu og dreifingu á öllum mögulegum mörkuðum. Hjarta fyrirtækisins er kaffibrennslan á Stapahrauni í Hafnarfirði, sem er í örum vexti, og fjórar sérverslanir undir merkjum Te & Kaffi sem eru staðsettar á Laugavegi 27, Suðurveri, Kringlu og Smáralind.

Strangt gæðaeftirlit hjá fyrirtækinu á öllu vinnsluferli kaffibaunanna tryggja gæði sem kaffiunnendur á Íslandi geta treyst. Brennsla, pökkun og geymsluþol kaffisins eru mikilvægir þættir til þess að það bragðist vel og haldi ferskleika sínum alla leið til neytandans. Hjá fyrirtækinu er leitast við að velja bestu kaffitegundir sem völ er á og eru þær smakkaðar af okkar þaulvönu kaffisérfræðingum til þess að tryggja gæði og gott bragð. Árni Ragnarsson, brennslumeistari Te & Kaffi, varð í öðru sæti á heimsmeistaramóti í kaffismökkun á síðasta ári og skiptir það gríðarlegu miklu máli að hafa slíkan mann innan raða fyrirtækis sem hugsar um að bjóða upp á bestu kaffitegundir heimsins hverju sinni.

Með nýrri tækni við ristun aukast gæði brennslunnar enn frekar þar sem hægt er að stjórna brennslunni á mismunandi tegundum kaffibauna af mjög mikilli nákvæmni og tryggja jafna og stöðuga brennslu, ásamt því að draga enn betur fram sérkenni og keim hverrar kaffitegundar. Til að fullkomna ferskleikan er öllu kaffinu frá Te & kaffi pakkað strax eftir ristun í umbúðir með einstreymisventli sem tryggir ferskleikann.

Ásamt þessari lykil starfssemi rekur Te & Kaffi heildsölu á kaffi, tei og ýmsum tengdum vörum. Sókn fyrirtækisins inn á hinn almenna matvörumarkað hófst fyrir alvöru árið 2004 og í dag hefur fyrirtækið fest sig í sessi með tvær vörulínur í kaffiflokk allra helstu matvöruverslana landsins. Eftirspurn eftir vörum og þjónustu Te & Kaffi á hótel og veitingamarkaðinn á sér lengri sögu. Veitingamenn hafa um langt árabil getað stólað á þekkingu sérfræðinga Te & Kaffi og umsvif fyrirtækisins á þeim markaði hefur alla tíð stjórnast af eftirspurn fagaðila í veitingabransanum sem þekkja gott hráefni og vilja góða þjónustu.

Samhliða vexti á ofantöldum mörkuðum fór eftirspurn eftir vörum Te & Kaffi inn á skrifstofu- og fyrirtækjamarkað vaxandi en fyrirtækið hafði ekki bolmagn til að sinna þeirri eftirspurn af fullum krafti. Árið 2006 keypti Penninn 30% hlut í Te & Kaffi og sáu eigendur Pennans mikil tækifæri í sölu og dreifingu á vörum Te & Kaffi inn á skrifstofu- og fyrirtækjamarkaðinn þar sem Penninn hafði sterka stöðu með sölu á skrifstofuvörum. Með náinni samvinnu fyrirtækjanna með sölu og dreifingu á kaffivélalausnum og tengdum vörum inn á þennan markað hefur náðst góður árangur. Ekkert hefur breyst í daglegri stjórnun Te & Kaffi við innkomu Pennans, hún er enn algjörlega í höndum hjónanna sem stofnuðu það fyrir tæpum aldarfjórðungi sem eiga enn 70% í fyrirtækinu.

Árið 2006 seldi Te & Kaffi dótturfyrirtæki sitt, Kaffiheim, sem rekur kaffihús undir nafni Te & Kaffi. Á þeim tveimur árum sem liðin eru frá sölunni hefur Kaffiheimur opnað mörg kaffihús, meðal annars í bókaverslunum Eymundsson og í Máli og Menningu á Laugavegi. Alls eru í dag níu kaffihús rekin undir nafni Te & Kaffi og er náin samvinna milli Kaffiheims og Te & Kaffi varðandi starfssemi þessara kaffihúsa.