Um okkur

Um Te & Kaffi

Það má með sanni segja að saga fyrirtækisins sé samofin þeirri kaffimenningu sem blómstrað hefur á Íslandi undanfarin ár. Þegar við hjónin opnuðum fyrstu verslun okkar var hvergi hægt að fá gott kaffi á veitingastöðum á Íslandi. Fyrsta verslun okkar var opnuð í apríl 1984 og má segja að hún hafi verið upphafið að þeirri “kaffibyltingu” sem hér varð. Undir vörumerki Te & Kaffi er í dag rekin kaffibrennsla, heildverslun, verslanir og kaffihús.

Gautaborg

Kaffisagan okkar byrjaði í Gautaborg árið 1981. Þegar við Berglind bjuggum þar vann ég sem matreiðslumaður á hóteli og hún stúderaði, ásamt því að ganga með fyrsta barn okkar undir belti. Við hrifumst af því hve mikil stemning fylgdi því að versla í litlu te-og kaffibúðunum. Sérstaklega fannst okkur skemmtilegt að drekka morgunkaffið á stað sem var í hjarta Gautaborgar, en þar voru tveir Husquarna bakaraofnar og voru bakaðar bollur í öðrum en kaffi ristað í hinum. Á þessum stað keyptum við okkur oft óbrenndar kaffibaunir og ristuðum heima í eldhúsi í ofninum okkar. Við féllum fyrir þessari uppgötvun og ræddum um það að gaman væri að færa þessa menningu sem okkur fannst svo skemmtileg með öllum sínum leyndardómum og rómantík, heim til Íslands. Það má því segja að hugmyndin að Te & Kaffi hafi fæðst í litla eldhúsinu okkar í Gautaborg !

Te & Kaffi á Íslandi

Við byrjuðum að vinna að því að láta þennan draum rætast af fullri alvöru í byrjun ársins 1984 og tókum á leigu húsnæði í kjallara að Barónsstíg 18. Þar opnuðum við síðan fyrstu Te & Kaffi verslunina 28. apríl 1984. Í byrjun vann ég í mínu fagi sem matreiðslumaður og Berglind hugsaði um reksturinn sem annars var aðaláhugamál okkar beggja og lögðum við stundum nótt við dag til þess að allt gæti gengið. Fljótlega langaði okkur einnig að koma upp litlu kaffihúsi með búðinni og gerðum við það tveimur árum síðar, í bakhúsi á Laugavegi 24. Á þessum tíma var áhugamál okkar orðið starf okkar beggja og lifibrauð. Við vorum full af hugmyndum um framtíð fyrirtækisins og 1987 komum við okkur upp húsnæði í Hafnarfirði og hófum undirbúning að kaffiframleiðslunni.

Fagmennskan í fyrirrúmi

Frá fyrsta degi hefur hugsjónin verið sú að byggja upp fyrirtækið með fagmennsku og þekkingu að leiðarljósi og að innan fyrirtækisins megi finna þá þekkingu á vöru og þjónustu sem það stendur fyrir. Hvort sem um er að ræða hráefnið sjálft eða framleiðslutækin þá finnum við alltaf réttu lausnina fyrir okkar viðskiptavini og fylgjum þeim eftir við að bæta gæðin til sinna viðskiptavina með því til dæmis að reka kaffiskóla fyrir kaffibarþjóna.

Við leggjum einnig ríka áherslu á að vera áfram framleiðslufyrirtæki með samfélagslega ábyrgð. Með okkur starfar frábær hópur af áhugasömu sérfróðu og duglegu fólki sem hefur unnið með okkur í gegnum árin og sumir í áratugi. Markmið okkar er að halda áfram á sömu braut, framleiða gæðakaffi og te og miðla þekkingu okkar og reynslu. Við rekum kaffibrennslu sem er mjög vel tækjum búin og vinnur samkvæmt ströngustu kröfum um gæði í ristun og umhverfisvernd og er hún sú nútímalegasta sinnar tegundar á Íslandi. Þar nýtist vel sú þekking sem orðið hefur til í gegnum árin varðandi ristun og meðhöndlun á hráefninu en það skiptir höfuðmáli til að ná fram bestu gæðum. Við höfum lagt á það áherslu að kenna Íslendingum að meta gott kaffi og gera ávallt kröfur um gæði hvort sem er heima eða að heiman.

20 ára afmælið

Á 20 ára afmælisárinu árið 2004 urðu tímamót hjá fyrirtækinu þegar framleiðsluvörur okkar fóru meira á almennan markað. Margir þekktu þá fyrirtækið af verslunum þess og kaffihúsum og framleiðsla fyrirtækisins var þegar orðin umtalsverð en þjónustan hafði að mestu verið fyrir veitinga-og skrifstofumarkað.

Margt hafði breyst á þessum tuttugu árum og virðing og áhugi fyrir góðu kaffi hafði vaxið mikið. Á afmælisárinu fékk Te & Kaffi nýtt útlit og nýtt vörumerki. Mikill metnaður var í hópi kaffibarþjóna okkar, sem tóku orðið þátt í ýmsum keppnum og unnu marga sigra.

Te & Kaffiheimurinn

Te & Kaffi hefur í gegnum árin reynt að láta gott af sér leiða með því að styðja við ýmis verkefni innan kaffiheimsins sem og utan og við leitumst við að styðja við bændur í gegnum gegnsætt ferli. Fairtrade samtökin voru stofnuð með því markmiði að gæta hagsmuna þeirra sem minna mega sín. Fairtrade hjálpar smábændum sem hafa ekki þekkingu á viðskiptum og geta ekki samið sjálfir eða voru á einhvern hátt þvingaðir til óhagstæðra samninga. Te & Kaffi er eina fyrirtækið á Íslandi sem hefur leyfi til þess að framleiða Fairtrade vottað kaffi í dag og hefur fyrirtækið stutt við þessi samtök af heilum hug.

Fyrirtæki okkar hefur einnig stutt um árabil við Barnahjálp Sameinuðu þjóðanna, UNICEF, með sölu á kaffi til fyrirtækja og rennur hluti af ágóðanum til samtakanna. Hefur það verkefni gengið mjög vel og fyrirtæki hafa almennt sýnt verkefninu velvilja og við erum einnig stolt af að geta stutt við það göfuga starf sem fer fram á vegum UNICEF.

Við viljum trúa því að Íslendingar styðji áfram við íslenska framleiðslu og njóti þess að drekka gott og ferskt kaffi framleitt á Íslandi.

Góðan kaffidag!

Sigmundur Dýrfjörð og Berglind Guðbrandsdóttir